Икки күннээх хатыһыылаах күрэх түмүгүнэн 28 очкону ылан Хаҥаластан Егор Филиппов эрэллээхтик бастаата. Иккис миэстэҕэ 35 очколаах Алексей Козлов (Усуйаана), үһүс миэстэҕэ 37 очколаах Артем Варданян (Нам) таҕыстылар. Туһааннааҕынан 4, 5, 6 миэстэлэри ыллылар — Алексей Кутуков (Нам) — 37, Дмитрий Попов (Уус Алдан) — 39, Антон Тойтонов (Нам) — 43. Конкурска барыта 123 киһи кытынна. Куоластаабыт дьонтон 42 киһи Уйбаан Белолюбскайга маҥнайгы миэстэни биэрдэ, 29 киһи Егор Филипповка, 21киһи Алексей Кутуковка, 15 киһи Дмитрий Поповка.

Бэс ыйын 27 күнүгэр конкурс кыайыылаахтарыгар сертификат туттарааһына буолан ааста. Бастакы миэстэни 3 сөптөөх эппиэти биэрбит Егор Винокуров ылан олохтоох усулуобуйаҕа кырааска оҥорон таһаарар «ARCTIC professional» фирматтан 7000 солкуобайдаах сертификат тутан үөрдэ-көттө. Иккис миэстэҕэ Ньурбаттан конкурска кыттыбыт Аркадий Григорьев таҕыста, кини Хотугулуу Илиҥҥи федеральнай университет медицинскай клиникатын өҥөтүнэн туһанарга 5000 солкуобайдаах сертификатынан наҕараадаланна. Үһүс миэстэни Усуйаана улууһуттан кыттыбыт Яков Сивцев ылла итиэннэ саха дьоно-сэргэтэ сөбүлээн сылдьар “Охотник на Ярославского” булт маҕаһыыныттан 3000 солкуобайдаах сертификат тутта.

Конкурска кыттыбыттары барыгытын өссө төгүл тапталлаах Сахабыт сиригэр самаан сайын кэлбитинэн истиҥник эҕэрдэлиибит.
Инникитин даҕаны университет “Биир кэлим атыыга ситимин” сайтыгар ыытыллар конкурстарга кыттыҥ диэн ыҥырабыт. Эһигини сотору кэминэн “XXXI cайыҥҥы олимпийскай оонньуулар кыайыылаахтарын таба таай” конкурс күүтэр.